روايات وقصص

غرفة تحقيق

الصورة ديه من غرفة التحقيق لفيديو أذاعته الشرطة وهي بتحقق مع واحدة ست، لكن أثناء التحقيق هيعرض المحققين فيديو لقوه على تليفونها، هيكون صدمة ليها وهيقلب الرأي العام الأمريكي كله.

في يوم من أيام سنة ٢٠٢٠ بيوصل اتصال لرقم الطوارئ ٩١١ من واحدة ست بتتكلم بمنتهى الذعر، حاول الموظف اللي رد عليها يهديها علشان يفهم إيه مشكلتها لأنه ماكنش قادر يسمعها بسبب طريقتها في الكلام.

حاولت الست تاخد نفسها وتتكلم بهدوء، وبعد ما خلصت عياط قالت للموظف: أرجوك الحقني، صديقي، صديقي مش بيتكلم ولا بيتحرك، وإحنا بنلعب “استغماية” امبارح، خبيته في شنطة السفر وكنت تحت تأثير المشروبات، فنمت، صحيت لقيته مش بينطق!

مجرد ما الموظف استلم البلاغ خد بياناتها، وقالتله إن اسمها (سارة)، وأخد العنوان، وفي خلال دقايق كانت وصلت الشرطة والإسعاف، دخل المحققين البيت ومعاهم المسعفين ولقوا سارة عمالة تعيط منهارة، وقدامها شنطة سفر كبيرة ومرمي جنبها الشخص اللي هي بلغت عنه.

بدأ المسعفين يفحصوه، وكانت الصدمة إنهم لقوه فارق الحياة من ساعات نتيجة عدم قدرته على التنفس، الشخص ده كان موجود جوا الشنطة ومش قادر ياخد نفسه، ومجرد ما سارة سمعت التفاصيل ديه دخلت في حالة انهيار من الصريخ.

المحققين بدأوا يهدوها وأخدوها وراحوا قسم الشرطة علشان يكملوا باقي الإجراءات، هناك بدأت سارة تحكي اللي حصل؛ قالت إن هي في الليلة ديه كانت سهرانة هي وحبيبها (خورخي) وبيضحكوا ومبسوطين آخر انبساط.

لحد ما خورخي قالها إيه رأيك يا سارة نلعب “استغماية”؟

ردت سارة وقالتله موافقة، وبسبب إن جسمه نحيف وقصير اقترحت عليه يدخل يستخبى جوا شنطة السفر لأن الأمر هيكون مضحك، بالفعل دخل خورخي الشنطة وهي قفلت عليه وبعدين طلعت الغرفة اللي في الدور العلوي.

طلعت قعدت شوية على السرير وبسبب المشروبات اللي كانت شرباها نامت، كانت متأكدة إن خورخي بكل سهولة هيعرف يخرج من الشنطة لأن الموضوع مش صعب يعني، لكنها صحيت من النوم ولقت الكارثة اللي حصلت وبلغت الشرطة.

بعد ما سمع المحقق روايتها قالها خلاص يا سارة، تقدري تروحي دلوقتي وإحنا لما نحتاجك تاني هنبعتلك، بس هتسيبي تليفونك يتفحص لأن ده إجراء متبع في القضايا ديه، ردت عليه سارة بكل ثقة وقالتله أكيد طبعًا واديته التليفون ومشيت.

في الوقت ده الشخص راح للطب الشرعي علشان يتم فحصه، وتاني يوم مباشرة اتفاجئت سارة إن محقق من الشرطة بيتصل بيها علشان تيجي تكمل باقي الإجراءات والتحقيقات، وبالفعل راحت سارة للمرة التانية ودخلت غرفة التحقيق وبدأ المحققين يسألوها عن تفاصيل اللي حصل وهي بتعيد نفس الرواية للمرة التانية.

بعد ما خلصت كلامها دخلت محققة معاها لاب توب، فتحته وبدأت تعرض فيديوهات قدامها، فيديوهات متصورة بتليفون سارة، سارة لما شافتهم مكانتش قادرة تنطق من الصدمة!

بس قبل ما أقولك إيه اللي كان في الفيديوهات ديه وليه القضية اتحولت لرأي عام، تعالي سريعًا أعرفك على سارة وخورخي.

في مدينة اسمها (وينتر بارك) تابعة لولاية فلوريدا الأمريكية، كان فيه شقة متواضعة عايش فيها ست اسمها سارة بون عمرها ٤٢ سنة مع حبيبها خورخي توريس ٤٢ سنة برده.

في الوقت ده سارة بون كانت منفصلة وبتعيش أسوأ فترات حياتها لأن طليقها أخد حضانة ولادها، وبعد ما ارتبطت بخورخي اللي كان عنده ٣ أبناء هو كمان، على أمل إن هي تتخطى الحالة اللي كانت فيها، إلا إن العلاقة ديه ماكنتش مستقرة أبدًا.

مشاكل مستمرة وخلافات بسبب الغيرة بتوصل لتصرفات مؤذية، لدرجة إن الشرطة كانت بتروح ليهم كل شوية بسبب البلاغات اللي كل واحد بيقدمها في التاني، مرة خورخي بيتعرض لإجراءات قانونية بسبب تصرفاته مع سارة، ومرة سارة بتتعرض لنفس الإجراءات بسبب إنها حاولت تتعامل معاه بعنف، لدرجة إن المحكمة أصدرت حكم إن محدش فيهم يقرب للتاني، إلا إن هما كانوا بيرجعوا يعيشوا مع بعض برده.

فضلت الحياة بينهم بالشكل ده لحد ما وصلنا ليوم ٢٣ فبراير سنة ٢٠٢٢، وفي اليوم ده هو اللي حصل فيه كل حاجة قولناها في البداية، خلينا بقى نرجع لغرفة التحقيقات.

دخلت المحققة ومعاها لاب توب عليه فيديوهات من تليفون سارة اللي أخدوه منها علشان يفحصوه، الفيديوهات ديه قدر يطلعها فريق الأدلة الرقمية من على التليفون بعد ما سارة مسحتهم وهي فاكرة إن محدش هيقدر يرجعهم تاني، والفيديوهات ديه هيكون فيها توثيق اللي حصل.

لأن هما لقوا سارة مصورة فيديوهات لخورخي وهو جوا الشنطة مقفول عليه وعمال يتوسل ليها تخرجه لأنه مش قادر يتنفس، والصادم إن سارة كانت بترد عليه وهي بتضحك وتقوله ببرود: نعم، هذا ما تفعله عندما تؤذيني.. هذا ما أشعر به عندما تخونني!

وفي النهاية تسيبه وهو عمال يتوسل ليها وتقفل الأوضة وتطلع تنام، وبعد ما شافت الفيديوهات انهارت ومكنتش مصدقة إن هما قدروا يوصلوا للفيديوهات، لكن المحققين أخدوها ووجهوا ليها تهمة التسبب في رحيله من الدرجة التانية.

بعدها يظهر تقرير الطب الشرعي اللي وضح إن خورخي كان على جسمه كدمات نتيجة استخدام عصا بيسبول لقوها في الشقة، وده أكد إنها كانت بتتعامل معاه بعنف وهو تحت تأثير المشروبات علشان تجبره يدخل الشنطة لحد ما قفلت عليه.

طبعًا تفاصيل القضية لما اتنشرت قلبت أمريكا كلها، لكن الغريب إن محاكمة سارة استمرت لـ ٤ سنين كاملين بسبب إن المحكمة غيرت ليها ٨ محاميين لأنها كانت بتشتكي من عدم كفاءتهم وبتطلب تغييرهم.

محاكمة كانت بتغطيها وسائل الإعلام لحظة بلحظة وبتتذاع على الهواء مباشرة، كانت كل شوية تبعت للقاضي رسايل وطلبات ممكن تتخطى الـ ٥٠ صفحة في كل جلسة.

لدرجة إن القاضي نفذ صبره وأصدر حكم استثنائي إن هي اللي تدافع عن نفسها، وفي أكتوبر ٢٠٢٤ بدأت محاكمتها على الهواء مباشرة.

طلعت سارة على منصة الشهود وفضلت تتكلم لساعات، مدعية إن خورخي كان بيقولها كلام مخيف حتى وهو داخل الشنطة، وإنها كانت خايفة جدًا لدرجة إنها مقدرتش تقرب، لكن فيديوهات التليفون اللي اتعرضت قدام هيئة المحلفين نسفت كل كلمة قالتها؛ لأنها أظهرتها بتضحك وتسخر منه ببرود بدون أي أثر للخوف.

وفي النهاية أصدرت المحكمة حكمها وهو السجن مدى الحياة على سارة بون بدون إمكانية الإفراج المشروط، يعني سارة بون هتفضل في السجن لبقية حياتها.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى