روايات وقصص

سافرت من الصعيد للقاهرة

سافرت من الصعيد للقاهره عشان ازور اختي العيانه بس لما وصلت فتحتلي حماتها وقالتلي روحي دلوقت وتعالي مره تانيه!

اتصدمت لانها عارفه مشواري وانا كنت مدياهم خبر بجيتي
عشان كده دخلت رغم عنها، واللي شوفته جوه خلى جسمي كله قشعر من الصدمه!!!!

وأنا مسافرة من الصعيد للقاهرة كان كل همي أطمن على منيرة أختي، مكنش في دماغي أبداً إن السكة دي هتنتهي بالشكل الغريب ده.

من يوم ما أمنا الله يرحمها غابت ومبقاش لينا في الدنيا دي غير بعض، منيرة اتجوزت واحد من القاهرة وعاشت معاه هناك وكل امورها كانت تمام
بس من كم شهر كده الحال اتغير، كل ما أتصل أطمن عليها ألاقي صوتها تعبان ومهزوز ومش قادره تنطق كلمتين على بعض، وتقولي إنها عيانة جداً ومش قادرة تتكلم.

قلبي كان بيتقطع عليها وكل يوم أكلم جوزي وأقوله لازم أروح أطمن على أختي بنفسي.

اتصلت بيها وقلت لها أنا جايه لك يا منيرة بكرة، حسيت بتردد غريب في صوتها وكأنها بتتلعثم وعايزة تمنعني أجي، بس رجعت وسكتت وقالت لي تمام يا حبيبتي تعالي تنوريني بس ابقي رني عليا قبل ما توصلي بنص ساعة بالظبط، استغربت طلبها ده وفضلت أسأل نفسي هي ليه عايزة ميعاد محدد، بس رجعت وقلت لنفسي عيب دي أختي والبيوت أسرار، يمكن الشقة مش مترتبة ولا تعبانة ومش قادرة تقم تروق، فقلت لها خلاص ماشي ولا يهمك.

يوم السفر ركبت القطر والتوتر كان ماكل قلبي، طول الطريق وأنا باصة في الشباك وبدعي ربنا تطلع كويسه وميكونش فيها حاجة وحشة، ومن كتر القلق والتفكير نسيت تماماً حكاية إني أرن قبلها بنص ساعة، ولقيت نفسي قدام الباب خبطت خبطتين خفاف وأنا ببتسم ومستنية الباب يفتح وأحضنها.

بس دقيقتين ولقيت الباب بيفتح ببطء وشوفت حماتها قدامي، أول ما عينها جات في عيني وشها اصفر وباه كأنها شافت عفريت، ومن غير سلام ولا حتى أهلاً وسهلاً لقتني بتزعق فيا بصوت مخنوق وبتقولي بخضة واضحة.. انتي.. انتي إيه اللي جابك دلوقتي؟ إنتي متصلتيش ليه قبل ما تيجي زي ما اتفقنا؟، اتفاجئت من طريقتها ونبرة صوتها اللي فيها قلق غريب، ولسه هعتذر وأقولها معلش نسيت وكنت مستعجلة عشان أشوفها، لقيتها بتقاطعني بعصبية وهي بتزقني لبره وبتقولي.. روحي دلوقتي وتعالي مره تانيه.. منيرة نايمة دلوقتي.

الصدمة نزلت عليا زي القلم، هما إزاي يقولوا كده وهما عارفين مشواري من الصعيد لحد هنا، وكمان منيرة كانت عارفة ومستاذنة منها قبل ما أتحرك من بلدي، ولسه هرد سمعت صوت جوز أختي جاي من جوه البيت وهو بيقول .. مين يا أمي، مين على الباب؟، امه بصت وراها وقالت له بسرعة .. مفيش دي أخت مراتك.. بس هتمشي دلوقتي وتيجي وقت تاني، ولسه بتمد ايدها تقفل الباب في وشي بقوة، حسيت إن روحي بتتسحب وحطيت أيدي بكل قوتي على باب الشقة ومنعتها تقفله، وصرخت فيها وأنا ملامحي متغيرة وبقولها.. إيه اللي بيحصل جوه هنا؟ ومنيرة أختي فين عايزة أشوفها بنفسي.

حماتها زعقت بصوت عالي وقالت لي بحدة وغضب.. هتكون فين يعني؟ ما قلت لك عيانه ونايمه ومرهقة ومش هينفع نصحيها دلوقتي، روحي شوفي لكي حتة استريحي فيها لحد ما نبقى نكلمك

بس أنا مبقاش عندي طاقة أسمع كلام تاني، وجوه قلبي نار بتتحرك، دفعتها بقوه من قدامي ودخلت الشقة جري زي المجنونة.

حماتها جريت ورايا وهي بتصرخ وعايزة تلحقني وتشدني، بس كنت سبقتها ودخلت وياريتني ما دخلت مصدقتش
اللي شافته عنيا وقتها صدمه متتوصفش خلت جسمي كله قشعر ومقدرتش انطق بحرف واحد!!!!!!

أول ما دخلت الصالة، رجلي اتسمّرت في الأرض، وحسيت إن نفسي اتسحب من صدري.

لقيت منيرة أختي قاعدة على كرسي جنب الحيطة، لابسة هدوم بيت قديمة، وشكلها متغير تماماً. وشها أصفر، وعينيها غايرة، وشعرها منكوش، وإيديها مقيدة بقطعة قماش في دراع الكرسي!

صرخت من غير ما أحس بنفسي منيرة!!! إيه اللي عملوه فيكي يا حبيبتي؟!

جريت عليها وأنا مش مصدقة اللي شايفاه، لكن حماتها لحقتني ومسكتني من دراعي بعنف وقالت إنتي اتجننتي؟! ابعدي عنها!

بصيت لها بصدمة وقلت إنتي قيداها ليه؟! دي أختي ولا مقيدة عندكم؟!

وفي اللحظة دي جوز أختي خرج من الأوضة، ولما شافني واقفة جنبها اتلخبط وقال إنتي دخلتي هنا إزاي؟ مش المفروض كنتي تتصلي قبل ما تيجي؟

بصيت له وأنا دموعي نازلة وقلت يعني إنت كمان كنت عارف؟! كنتوا مخبيين أختي عني ليه؟!

قرب مني وقال بنبرة حاول يخليها هادية اهدي بس، الموضوع مش زي ما إنتي فاهمة، منيرة تعبانة نفسياً ومش في وعيها، وإحنا بنحاول نسيطر عليها عشان متضايقش نفسها.

بصيت لمنيرة، ولقيتها بتحاول تتكلم، لكن صوتها كان ضعيف جداً، ودموعها بتنزل وهي بتحرك راسها بالنفي.

قربت منها وفكيت القماشة من إيديها، وفضلت أطبطب عليها وأقول متخافيش

السابق1 من 4
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى