
أنا راجل متجوز أربعة، وشغال مقاول كبير، وعندي فلوس وعقارات في البنك، وعمارات بنيتها من تعبي وشقايا بس اللي محدش يعرفه إن كل ده بدأ من تحت الصفر، وإن فيه واحدة ست شقيت معايا ووقفت جنبي لحد ما بقيت اللي أنا فيه دلوقتي، وفي الآخر كان ده جزاءها!
زمان، قبل ما ربنا يكرمني وأبقى مقاول كبير، كنت شغال باليومية في المباني. يوم ألاقي شغل ويوم أقعد من غير شغل، وأفضل أحسبها بالورقة والقلم عشان أعرف هصرف على بيتي وعيالي منين.
كنت بشيل شكاير الأسمنت، وأنقل الطوب، وأرجع آخر النهار جسمي مكسور من التعب، وإيدي متشققة من الشغل، وكل اللي في جيبي كام جنيه بالعافية يكفّوا أكل وشرب اليوم.
بس عمري ما حسيت إني لوحدي، لأن مراتي الأولى كانت دايمًا في ضهري.
الست دي كانت بتشقى معايا من قلبها، وكانت عارفة إننا مش هنفضل طول عمرنا في الضيقة دي، وكانت دايمًا تقولي اصبر يا حبيبى، ربنا مش هينسانا، وبكرة حالنا هيتغير، وعيالنا هيكبروا ونفرح بيهم.
ماكنتش بتكتفي بالكلام وبس، دي كانت ساعات تسيب البيت وتيجي لحد المكان اللي بشتغل فيه عشان تجيبلي الأكل، ولو لقتني محتاج مساعدة كانت تقف جنبي وتناولني الطوب، وتساعدني على قد ما تقدر، من غير ما تشتكي ولا تحسسني في يوم إني مقصر معاها.
والله العظيم، في أيام كتير كانت بتاكل لقمتين وتسيب الباقي ليا، ولو جبتلها حاجة بسيطة كانت تفرح بيها كأنها جبتلها الدنيا كلها.
فضلنا عايشين على الحال ده سنين، لحد ما ربنا فتحها عليا، وابتديت أشتغل لحسابي، وبعدها بقيت مقاول صغير، ومع الوقت كبرت شغلي، وبقيت أستلم مشاريع أكبر، لحد ما اسمي بقى معروف في السوق.
الفلوس ابتدت تدخل، وبعد ما كنت بحسب تمن رغيف العيش، بقيت أحط مبالغ كبيرة في البنك، وبنيت عمارة، وبعدها عمارة تانية، والتالتة كمان.
بقيت ألبس أغلى اللبس، وأركب أحدث العربيات، وأدخل أماكن زمان ماكنتش أحلم حتى إني أقف على بابها.
لكن المشكلة ماكانتش في الفلوس، المشكلة كانت فيا أنا!
لما الفلوس كترت، ابتديت أبص لنفسي بنظرة مختلفة، وحسيت إني بقيت راجل مهم، وإن الدنيا بقت تحت رجلي، ونسيت إن فيه ست كانت بتقف جنبي وأنا مش معايا تمن وجبة كويسة أجيبهالها.
لحد ما في يوم، دخلت حياتي واحدة تانية.
كانت أصغر مني بعشرين سنة، وبنت ما اتجوزتش قبل كده، وكانت جميلة وبتعرف تتكلم وتدلعني، وكل ما أشوفها أحس إني رجعت شاب من تاني.
ومن غير ما أفكر في عشرة السنين، ولا في الست اللي شالت معايا الهم، ولا في عيالي اللي كبروا في البيت اللي بنيناه سوا، لقيت نفسي بتعلق بيها يوم بعد يوم، لحد ما اتجوزتها على مراتي الأولى.
مراتي الأولى اتكسرت، بس ماكانش قدامها اختيار تانى .
كانت عارفة إن الطلاق معناه إنها هتسيب البيت اللي عاشت فيه عمرها، وكانت خايفة على عيالها من الضياع، وكمان أهلها ناس على قد حالهم، ومش هتقدر ترجع لهم وتبدأ من جديد بعد كل السنين دي.
عشان كده اضطرت تستحمل وتكمل، مش عشان قلبها سامحني، لكن عشان خاطر ولادها.
وأنا بدل ما أحس بالذنب وأحاول أعوضها عن اللي عملته فيها، غرقت أكتر في حياتي الجديدة، وابتديت أتعرف على ستات تانيين، لحد ما وصلت إني بقيت متجوز أربعة.
كنت فاكر إن الفلوس هتخليني أقدر أعمل أي حاجة، وإن كل ست ممكن أشتري رضاها بالفلوس والهدايا.
بس كنت ناسي إن فيه حاجات في الدنيا، مهما كان معاك فلوس، عمرك ما هتعرف تشتريها.
بعد ما اتجوزت مراتي التانية، واللي كانت أصغر مني بعشرين سنة، ابتديت أحس إن حياتي اتغيرت تمامًا. بقيت بصرف فلوس كتير على اللبس والخروج والسفر، وهي كانت بتحب المظاهر جدًا، وكل شوية تطلب مني حاجة جديدة.
أما مراتي الأولى، فكانت عايشة في شقتها مع عيالها، وأنا كنت بصرف عليهم، لكن وجودي في حياتهم بقى قليل، وكنت كل ما أحس إنها زعلانة أقول لنفسي ما أنا مش مقصر معاها في الفلوس.
لحد ما جه اليوم اللي اتعرفت فيه على مراتي التالتة.
كنت داخل أخلص شغل في مكتب استشارات هندسية، وهناك قابلت واحدة اسمها رانيا، عندها 32 سنة، مطلقة، وبتشتغل مديرة حسابات في المكتب.
كانت مختلفة عن مراتي التانية، هادية وعاقلة وبتعرف تتكلم في الشغل، وفي نفس الوقت كانت مهتمة بنفسها جدًا.
في الأول كانت علاقتنا مجرد تعاملات شغل، لكن مع الوقت ابتدت المكالمات تطول، ونتكلم في حاجات ملهاش علاقة بالشغل.
كانت بتسمعني وأنا بحكيلها عن ضغوط المقاولات والمشاكل اللي بقابلها، وكانت دايمًا تقولي إني راجل عصامي وعملت نفسي بنفسي.
الكلام ده كان بيدخل قلبي، خصوصًا إني بقيت بحب أي حد يحسسني إني راجل ناجح ومهم.
وفي مرة قالتلي إنت واضح إنك تعبت كتير عشان توصل للي إنت فيه، بس مش كل الناس اللي حواليك مقدرة ده.
الجملة دي فضلت ترن في ودني، وبدأت أحس إنها فاهماني أكتر من أي حد.
وبعد فترة، عرفت إنها عندها مشكلة في شقتها وإنها محتاجة مبلغ كبير عشان تشتري شقة تانية، فعرضت أساعدها.
لكن الموضوع ماوقفش عند المساعدة، وبعد شهور اتجوزتها، وبقت مراتي التالتة.
أما الجوازة الرابعة، فدي كانت حكاية تانية خالص.
كنت في افتتاح مشروع جديد، وهناك شوفت واحدة اسمها داليا، عندها 27 سنة، وكانت شغالة في شركة تسويق عقاري.
لفتت نظري من أول لحظة، مش بس بجمالها، لكن بطريقة كلامها وثقتها في نفسها.
اتعرفنا عن طريق واحد صاحبي، وبعدها بقينا نتقابل بحجة الشغل.
داليا كانت عارفة إني متجوز، وعارفة إن عندي زوجات تانيين، لكن ده ماكانش مانع بالنسبة لها.
وفي مرة سألتني هو إنت ليه بتحب تتجوز كتير؟
ضحكت وقلتلها يمكن عشان ربنا موسعها عليا، وعشان كل واحدة فيهم ليها حاجة مختلفة.
ردت عليا وقالت طب وأنا ممكن أبقى مختلفة عنهم كلهم.
ضحكت وقتها، لكن الحقيقة إن كلامها عجبني.
وبعد فترة قصيرة، لقيت نفسي بطلب إيدها، واتجوزتها وبقت مراتي الرابعة.
وبكده بقيت متجوز أربعة، وكل واحدة فيهم في بيت لوحدها، وكل واحدة ليها مصاريفها وطلباتها.
كنت فاكر إني كده عايش أحسن حياة، وإن الفلوس اللي معايا هتخليني أقدر أرضيهم كلهم.
بس اللي ماكنتش واخد بالي منه، إن كل واحدة بدأت تطلب مني حقوق وامتيازات أكتر من التانية، والمشاكل بينهم بدأت تزيد.
وفي وسط كل ده، كانت مراتي الأولى ساكتة.
لا بتطلب دهب، ولا سفر، ولا عربية جديدة، ولا حتى بتسألني عن الفلوس اللي بصرفها على باقي الزوجات.
كانت بس بتطلب إني أفتكر إن ليا بيت قديم وعيال مستنيين أبوهم.
وأنا كنت كل مرة أتحجج بالشغل.
وفي يوم جالي عرض مشروع كبير جدًا، مشروع لو تم على خير هيضاعف ثروتي ويمكن يخليني من أكبر المقاولين في البلد.
المشروع كان محتاج أمان وحماية ونفوذ، لأن فيه تعاملات كبيرة وتصاريح وموافقات، وكان لازم أدخل معايا شريك تقيل يقدر يضمنلي إن الشغل يمشي من غير تعطيل أو مشاكل.
ومن خلال واحد صاحبي، اتعرفت على رجل أعمال كبير اسمه شريف البدري، راجل ليه علاقات ونفوذ، وكلمته مسموعة في السوق.
قعدنا مع بعض أكتر من مرة، واتكلمنا في تفاصيل المشروع، وكان واضح إنه
مقتنع بشغلي وإمكانياتي، لحد ما في آخر قعدة قال لي
أنا موافق أدخل معاك شريك، والمشروع ده هنعمله بشكل يضمن نجاحنا إحنا الاتنين، بس عندي طلب شخصي.
استغربت وسألته طلب إيه يا شريف بيه؟
ابتسم وقال أنا عندي أخت اسمها ليلى، منفصلة، وعندي فيها ثقة كبيرة، وعايزها تعيش في مستوى يليق بيها، وإنت راجل مقتدر وعندك خير كتير، وأنا شايف إنك مناسب ليها.
ضحكت وقلتله يا شريف بيه، أنا متجوز أربعة.
رد عليا بهدوء عارف، وعشان كده بقولك فكر كويس، أنا مش هضغط عليك، بس أختي مش هتكون زوجة خامسة، وإنت أكيد فاهم قصدي.
خرجت من عنده وأنا دماغي مشغولة.
المشروع كان فرصة عمري، والجوازة الخامسة مستحيلة وأنا متجوز أربعة، وبدأت أفكر في حل.
ولأول مرة من سنين، لقيت نفسي بفكر في مراتي الأولى، الست الوحيدة اللي عمرها ما طلبت مني حاجة، ولا دخلت معايا في خلاف بسبب زوجاتي، ولا حتى كانت بتسألني أنا بقضي وقتي فين.
وقلت لنفسي إن طلاقها مش هيكون مشكلة، خصوصًا إني أقدر أأمن مستقبلها ومستقبل عيالنا بالفلوس.
رجعت البيت يومها وأنا واخد قراري، وكنت مستني فرصة مناسبة عشان أتكلم مع مراتي الأولى.
اسمها فاطمة، اتجوزتها وأنا عندي 24 سنة، وهي كانت 20 سنة، يعني عشنا مع بعض أكتر من 25 سنة.
خلفنا ولدين وبنت، وكبروا قدام عينينا، وشافت معايا أيام محدش يتمنى يعيشها.
دخلت البيت لقيتها قاعدة في الصالة مع بنتنا، ولما شافتني قامت جابتلي الأكل زي عادتها.
قالتلي حمد لله على السلامة، اتأخرت النهارده، الأكل لسه سخن.
بصيتلها وأنا مش عارف أبدأ منين، لكن قلت لنفسي إن الموضوع لازم يخلص.
بعد ما أكلت، طلبت منها تقعد معايا عشان عايز أتكلم معاها في موضوع مهم.
بصتلي وقالت خير يا محمود؟ في حاجة حصلت في الشغل؟
قلت لها لا، بس أنا داخل على مشروع كبير جدًا، ومحتاج أرتب حياتي من جديد.
قالتلي ربنا يوفقك يا حبيبي، ويزيدك من فضله.
سكت شوية، وبعدها قلت أنا اتعرفت على رجل أعمال كبير، اسمه شريف البدري، وهنعمل مشروع مع بعض، بس هو عنده أخت منفصلة وعايز يجوزها ليا.
رفعت عينيها وبصتلي، لكن ما اتكلمتش.
كملت كلامي إنتِ عارفة إني متجوز أربعة، ومش هينفع أتجوز الخامسة، وعشان كده أنا بفكر أنهي جوازنا.
فضلت باصة ليّا كأنها مش مستوعبة اللي سمعته.
وبعد لحظات قالت بصوت هادي تقصد إيه يا محمود؟
قلت لها يعني نطلق يا فاطمة، وأنا مش هسيبك محتاجة حاجة، هكتبلك شقة باسمك، وأحطلك مبلغ في البنك، وعيالنا مش هقصر معاهم.
ضحكت ضحكة صغيرة، بس كانت ضحكة وجع مش ضحكة فرحة.
وقالتلي يعني بعد 25 سنة جواز، وبعد ما كنت بشيل معاك الطوب والأسمنت، وبعد ما كنت باكل من لقمتك وأسيبلك الباقي عشان تشبع، وبعد ما بنيت نفسك وبقيت صاحب عمارات وملايين جاي تقولي إنك هتطلقني عشان مشروع؟
اتضايقت من كلامها وقلت يا فاطمة، أنا مش بنكر إنك وقفتي جنبي، وعمري ما هنكر فضلك، بس الدنيا اتغيرت، وكل واحد فينا لازم يشوف حياته.
ردت عليا الدنيا اتغيرت فعلًا يا محمود، بس مش هي اللي اتغيرت إنت اللي اتغيرت.
وسكتت شوية، وبعدها سألتني سؤال واحد
هو شريف البدري يعرف إنك وصلت للي إنت فيه على إيد مين؟
استغربت وقلت يعني إيه؟
قالت يعرف إنك كنت بتقف طول النهار في الشمس، وإن مراتك كانت بتجيلك بالأكل وتناولك الطوب؟ يعرف إنك لما كنت بترجع مهدود من التعب كنت بتلاقي بيتك مستنيك، وعيالك مستنيين لقمتهم؟
قلت بعصبية خلاص يا فاطمة، مش هنقعد نفتّح في القديم، أنا جاي أتكلم معاكي في قرار.
قامت من مكانها، ولمّت الأطباق، وقالتلي أنا مش هطلب منك تفضل معايا غصب عنك، ومش هعملك مشكلة، بس عندي طلب واحد.
سألتها طلب إيه؟
قالت عايزة يومين أفكر، وأتكلم مع عيالي، وبعدها هقولك قراري.
وافقت، وكنت متأكد إنها هتوافق على الطلاق، خصوصًا إني عارف إنها مش بتحب المشاكل.
لكن اللي حصل بعد كده ماكانش في حساباتي
عدّى اليومين، ورجعت البيت بالليل لقيت فاطمة قاعدة في الصالة، قدامها شوية ورق وملف قديم.
قالتلي تعالى يا محمود، أنا فكرت في كلامك، وقررت أوافق على الطلاق.
ارتحت من جوايا وقلت كنت عارف إنك هتفهمي، وأنا مش هسيبك محتاجة حاجة، وهكتبلك شقة وأحطلك مبلغ كويس في البنك.
بصتلي وقالت أنا مش عايزة منك هدايا يا محمود، أنا عايزة حقي.
استغربت وقلت حقك إيه؟ ما أنا هديكي اللي إنتِ عايزاه.
فتحت الملف اللي قدامها وطلعت منه ورق قديم، وقالت فاكر أول ما بدأت تشتغل لحسابك؟ فاكر لما بعت دهبي عشان تدفع مقدم أول معدة اشتريتها؟ فاكر الفلوس اللي كنت بحوشها من مصروفي عشان أساعدك؟.
قلت أيوه فاكر، بس إيه علاقة الكلام ده بالطلاق؟.
قالت علاقته إن أنا مش كنت مراتك وبس، أنا كنت شريكة في رحلة كفاحك، وكنت بحط كل اللي أملكه عشان تنجح. وإنت عمرك ما فكرت إن الست دي ليها حق غير إنها تاخد مصروفها وتربي عيالها.
ضحكت باستهانة وقلت يا فاطمة، إنتِ كنتِ بتساعدي جوزك، مش داخلة معايا في شركة.
ردت بثبات وده اللي أنا كنت فاكرة زيه بالظبط، لحد ما لقيتك بتعاملني كأني واحدة غريبة، وبتعرض عليا شوية فلوس عشان تخلص مني.
وبعدين طلعت ورقة تانية وقالت أنا مش هطلب منك جنيه زيادة عن حقي، لكن كل حاجة لازم تتحسب، وهستعين بمحامي يراجع معايا كل الممتلكات والحقوق اللي تخصني.
اتعصبت وقلت إنتِ هتدخلي محامين بينا بعد العشرة دي كلها؟.
قالت إنت اللي دخلت الفلوس والمصالح بينا يا محمود، لما قررت تبيع عشرة عمري عشان مشروع وجوازة جديدة.
وبعدها قامت وسبتني قاعد لوحدي.
تاني يوم، فاطمة راحت بنفسها لمحامي، وبدأت تجمع كل الأوراق والإيصالات القديمة، وطلبت منه يراجع حقوقها الشرعية والقانونية، وأي مساهمات مالية ليها في الممتلكات اللي اتبنت خلال سنين جوازهم.
أما أنا، فكنت فاكر إنها مجرد شوية عصبية وهتهدى، لكن اتفاجئت إنها بعتتلي رسالة بتقول فيها
يا محمود، أنا مش هخاصمك عشان ترجعلي، ولا هطلب منك تفضل معايا غصب عنك، لكن المرة دي مش هتنازل عن حقي عشان خاطر العشرة، لأنك إنت أول واحد فرّط فيها.
وساعتها بدأت أحس إن موضوع الطلاق مش هيخلص بالسهولة اللي كنت متخيلها.
بعد ما فاطمة راحت للمحامي، طلبت منه يراجع كل الممتلكات والأملاك اللي اتكونت خلال سنين جوازها من محمود.
وبعد كام يوم، طلبت مني أقابلها عشان نتفق على الطلاق.
روحت وأنا متوقع إنها هتطلب شقة ومبلغ في البنك، لكن أول ما قعدنا قالتلي
أنا عايزة نص أملاكك ونص الفلوس اللي في البنك يتكتبوا بأسماء ولادك.
بصتلها باستغراب وقلت إنتِ بتقولي إيه يا فاطمة؟ نص أملاكي إزاي؟ إنتِ عايزة تاخدي نص تعبي؟.
ردت بهدوء أنا مش باخد تعبك يا محمود، أنا بطلب إن ولادك يضمنوا مستقبلهم. إنت عندك أربع زوجات، وداخل على جوازة جديدة، وعندك مشروع كبير، ومش عارفة بكرة هتعمل إيه ولا فلوسك هتروح فين.
قلت بعصبية يعني إنتِ عايزة تتحكمي في ثروتي بعد ما أطلقك؟.
قالت أنا مش عايزة جنيه يتحط في جيبي، أنا عايزة نص الأملاك والفلوس يتسجلوا باسم ولادك، ويتعمل كل ده بشكل قانوني يحفظ حقوقهم. دول ولادك، ومن
حقهم يأمنوا مستقبلهم.
ضحكت وقلت هو إنتِ فاكرة إني هوزع تعبي على الناس كده؟ أنا اللي بنيت العمارات دي، وأنا اللي تعبت وجمعت الفلوس دي.
بصتلي وقالت وأنا كنت فين يا محمود لما كنت بتبني؟ كنت قاعدة في التكييف؟ ولا كنت بنزل أحوشلك الأكل وأقف جنبك في الشمس؟ أنا مش بنكر تعبك، بس إنت كمان تنكرش إني كنت شريكة رحلتك.
سكت شوية، وبعدها قلتلها أنا ممكن أديكي شقة ومبلغ محترم، لكن نص ثروتي مستحيل.
ردت من غير ما تتردد خلاص يا محمود، يبقى كل واحد فينا ياخد حقه بالطريقة القانونية، وأنا مش هتنازل عن أي حق يثبت إنه من حقي.
خرجت من عندها وأنا متعصب جدًا.
كنت داخل الاجتماع عشان أخلص من جوازي الأول وأفضّي مكاني لليلى، لكن لقيت نفسي قدام مطالب عمري ما توقعتها.
والأغرب إن فاطمة، اللي طول عمرها ساكتة، بقت بتتكلم بثقة وبتطالب بحقوقها، وأنا لأول مرة أحس إني مش قادر أفرض عليها قراري بالفلوس.
رجعت البيت واتصلت بشريف البدري، وقلتله إن فيه مشكلة في موضوع الجوازة.
رد عليا وقال أنا مستني ردك يا محمود، ومش هقدر أوقف شغل المشروع كتير.
قفلت معاه وأنا بفكر أوافق على طلبات فاطمة وأخسر جزء كبير من ثروتي، ولا أرفض وأدخل في مشاكل ممكن تضيع مني المشروع كله؟
بعد ما وافقت على طلبات فاطمة، خلصنا كل الإجراءات القانونية، واتكتبت نص الأملاك والفلوس باسم ولادي، وبقت فاطمة هي المسؤولة عن إدارة نصيبهم والحفاظ عليه لحد ما يكبروا ويقدروا يتصرفوا فيه بنفسهم.
وبعدها تم الطلاق رسميًا.
أنا بصراحة كنت حاسس إني خلصت من حمل كبير، وابتديت أجهز لجوازي من ليلى، خصوصًا إن شريف البدري كان مستني مني أخلص الموضوع عشان نبدأ المشروع.
وبالفعل، بعد فترة قصيرة اتجوزت ليلى، وكانت فرحانة جدًا بالجوازة، وشريف عملنا فرح كبير حضره رجال أعمال وشخصيات مهمة.
أما فاطمة، فكانت بعيدة عن كل ده.
ابتدت تهتم بأمور ولادها، وراحت بنفسها تتابع حساباتهم البنكية والأملاك اللي اتكتبت بأسمائهم، واتفقت مع محامي ومحاسب يتابعوا معاها كل حاجة، عشان تضمن إن محدش يقدر يقرب من حقوقهم.
وبعد ما اطمنت إن مستقبل ولادها بقى مأمّن، بدأت تهتم بنفسها.
اشترت هدوم جديدة، واهتمت بصحتها وشكلها، وبدأت تخرج مع صاحباتها وتزور قرايبها، وترجع تمارس الحاجات اللي كانت بتحبها ونسيتها وسط مسؤوليات البيت والجواز.
كانت كل ما تبص في المراية تحس إنها أخيرًا بقت شايفة نفسها، مش مجرد زوجة وأم طول الوقت.
وفي يوم، راحت مع واحدة صاحبتها لحفل خيري كبير، وهناك قابلت شريف البدري.
كان شريف موجود مع أخته ليلى، ولما شاف فاطمة راح سلم عليها بكل احترام.
قالها إزيك يا مدام فاطمة؟ عاملة إيه؟
ابتسمت وقالت الحمد لله، إزي حضرتك؟
قال أنا مبسوط إني شوفتك، وبصراحة كنت عايز أطمن عليكي من فترة.
بدأوا يتكلموا، واكتشف شريف إن فاطمة عندها شخصية قوية، وعقلية منظمة، وبتفهم كويس في إدارة الممتلكات والفلوس.
وفي وسط الكلام قالها واضح إنك ست قوية يا مدام فاطمة، وربنا يعوضك عن كل اللي فات.
ردت بابتسامة الحمد لله، أنا مش مستنية تعويض من حد، أنا بس قررت أهتم بنفسي زي ما كنت طول عمري بهتم بكل اللي حواليا.
الكلام ده فضل في دماغ شريف.
وبعد المناسبة، بدأ يسأل عنها ويعرف أخبارها، وكل مرة كان بيقابلها فيها كان بيكتشف جانب جديد من شخصيتها.
أما أنا، فكنت غرقان في حياتي الجديدة مع ليلى، ومبسوط إن المشروع بدأ يتحرك، ومش في دماغي إن فاطمة ممكن يكون ليها حياة تانية بعيد عني.
لكن الأيام كانت مخبية لينا مفاجأة ماكنتش متوقعها أنا ولا هي.
عدّى حوالي ست شهور على جوازي من ليلى، والمشروع اللي دخلت فيه مع شريف البدري بدأ يحقق نجاح كبير، وفلوسي زادت، وبقيت مشغول طول الوقت بالشغل والاجتماعات.
أما فاطمة، فكانت حياتها اتغيرت تمامًا.
بقت بتخرج وتروح مناسبات، واهتمت بنفسها، وبدأت تحضر اجتماعات تخص إدارة الأملاك اللي بقت مسؤولة عنها بصفتها وصية على أولادها.
وشريف كان بيشوفها من وقت للتاني في المناسبات، وكل مرة كان بيحترمها أكتر.
وفي يوم، كان عنده اجتماع مع مجموعة من رجال الأعمال بخصوص مشروع خيري، وفاطمة كانت موجودة لأنها بتشارك في تنظيم جزء من المشروع.
لاحظ إنها بتتكلم بثقة، وعندها قدرة على إدارة الأمور، ولما حصل خلاف بين اتنين من الموجودين، قدرت تحله بهدوء ومن غير ما تعلي صوتها.
بعد الاجتماع، قرب منها وقال بصراحة يا فاطمة، أنا كل مرة بتعامل معاكي باكتشف إن عندك شخصية مختلفة.
ضحكت وقالت دي مجاملة ولا تقييم أداء؟
ضحك وقال الاتنين، بس أنا بتكلم بجد.
ومن اليوم ده، بقى فيه تواصل بينهم، في البداية في حدود المناسبات والشغل، وبعدها بدأ شريف يتصل بيها يطمن عليها ويسألها عن أحوالها.
كان راجل محترم، مش بيحاول يفرض نفسه عليها، وده خلاها ترتاح في التعامل معاه.
وفي مرة، قالها إنه أعزب من خمس سنين، وإنه بعد غياب زوجته قفل على نفسه ومابقاش بيفكر في الجواز.
سألته طب وإيه اللي غير رأيك؟
بصلها وقال يمكن قابلت إنسانة خلتني أفكر إن لسه ممكن الواحد يبدأ من جديد.
فاطمة فهمت قصده، لكنها فضلت ساكتة.
أما أنا، فكانت حياتي مع ليلى بدأت تدخل في مشاكل.
ليلى كانت بتحب الخروج والسفر والمظاهر، وكل شوية تطلب مني أشتري لها حاجة جديدة، ولما كنت برفض كانت تقولي إنت مش بتبخل على نفسك بحاجة، لكن لما الموضوع ييجي عندي بتفكر في الفلوس!.
وفي نفس الوقت، بدأت التانية والتالتة والرابعة يشتكوا من اهتمامي بليلى، وكل واحدة شايفة إن ليها حقوق أكتر من الباقيين.
كنت بحاول أرضي الكل بالفلوس، لكن المشاكل ماكانتش بتخلص.
وفي يوم، وأنا في مكتبي، دخل عليا واحد من الموظفين وقال يا باشمهندس، أستاذ شريف البدري على التليفون.
رديت عليه، وبعد السلام والكلام في الشغل، شريف قال لي محمود، عايز أطلب منك طلب شخصي.
قلتله اتفضل يا شريف بيه.
قال أنا بفكر أتجوز، وعايزك تكون أول واحد يعرف.
ضحكت وقلت ألف مبروك يا راجل، مين سعيدة الحظ؟
قال بمنتهى الهدوء فاطمة طليقتك.
حسيت إن حد سكب عليا مية ساقعة.
فضلت ساكت، وبعدها قلت إنت بتهزر يا شريف؟
قال لا يا محمود، أنا بتكلم جد، وأنا عارف إنها كانت مراتك، وعارف إنكم اتطلقتوا من فترة، ومش داخل في حاجة تخصك.
قفلت المكالمة وأنا مش قادر أستوعب.
الغريب إني أنا اللي طلقتها، وأنا اللي اخترت أبعدها عن حياتي، لكن فكرة إنها تتجوز راجل تاني، وخصوصًا شريف البدري، ضايقتني بشكل ماقدرتش أفسره.
ولأول مرة من وقت طلاقنا، لقيت نفسي بسأل نفسي
هو أنا فعلًا كنت بحب فاطمة، ولا كنت متعود إنها موجودة في حياتي ومضمونة مهما عملت فيها؟
لكن اللي كان مستنيني أصعب من مجرد خبر جوازها
بعد المكالمة مع شريف، فضلت قاعد في مكتبي مش قادر أركز في أي حاجة.
كنت بسأل نفسي إزاي فاطمة وافقت تتجوز؟ وإمتى بقت مستعدة تدخل راجل تاني حياتها بعد كل السنين اللي عشناها؟
مسكت التليفون وفتحت صورتها القديمة، صورة من أيام ما كنا لسه في شقة صغيرة بالإيجار، وأنا راجع من الشغل هدومي كلها أسمنت وتراب، وهي واقفة جنبي وبتضحك.
افتكرت أيام كتير، وافتكرت إنها كانت بتفرح لما
أجيب لها كيلو لحمة، وكانت ساعات تبيع دهبها عشان نكمل مصاريف البيت.
لكن بدل ما أحس بالامتنان، لقيت نفسي متضايق إنها هتكون لراجل غيري.
رجعت البيت، وليلى كانت بتجهز عشان تخرج.
سألتني مالك يا محمود؟ وشك متغير ليه؟
قلت مفيش، بس شريف البدري كلمني النهارده.
قالت خير؟
قلت من غير ما أفكر بيقولي إنه هيتجوز فاطمة.
ليلى وقفت مكانها وبصتلي باستغراب طليقتك؟ هو شريف البدري هيتجوز طليقتك؟
قلت أيوه.
ضحكت وقالت طب وإنت مالك؟ ما إنت اللي طلقتها، ولا كنت فاكر إنها هتفضل مستنياك طول عمرها؟
الكلام ضايقني، لكن ماعرفتش أرد.
وفي الناحية التانية، كان شريف قاعد مع فاطمة في مكان هادي، وقالها إنه عايز يتقدم لها رسمي.
فاطمة قالتله يا أستاذ شريف، أنا مقدرة مشاعرك، لكن لازم تكون عارف إني عندي أولاد، وعندي مسؤوليات، ومش عايزة أدخل جواز جديد يكون فيه أي ضغط عليهم.
رد عليها أنا مش بطلب منك تتخلي عن مسؤولياتك، بالعكس، أنا عايزك تفضلي زي ما إنتِ، وعايز ولادك يكونوا جزء من حياتنا.
قالت وفي حاجة تانية، أنا مش عايزة حد يتجوزني شفقة عليا أو عشان أنا مطلقة.
ابتسم وقال أنا عندي 52 سنة يا فاطمة، وعشت تجربة جواز قبل كده، وعارف أنا عايز إيه. أنا عايز ست أعيش معاها في هدوء واحترام، وإنتِ لفتِ نظري بعقلك وشخصيتك قبل أي حاجة تانية.
طلبت منه يمهلها شوية، وبعد تفكير وافقت إنه ييجي يتقدم لها رسمي.
وبالفعل، شريف راح بيتها واتقدملها، واتفقوا على جواز بسيط.
أما أنا، فكنت كل يوم أسمع أخبار تجهيزات الجواز من شريف، وكل مرة أحاول أتصرف طبيعي، لكن جوايا كان فيه حاجة بتتحرق.
لحد ما جه يوم الفرح.
كنت حاضر باعتباري شريك شريف وصديقه، وماكنتش أقدر أعتذر من غير ما أعمل مشكلة في الشغل.
دخلت القاعة، وبعد شوية شوفت فاطمة نازلة على السلم بفستان أنيق، وشكلها كان مختلف تمامًا عن الست اللي سبتها من شهور.
كانت مبتسمة ووشها منور.
قربت مني وسلمت بكل هدوء وقالت إزيك يا محمود؟
قلت مبروك يا فاطمة.
قالت الله يبارك فيك، عقبالك.
ومشيت.
الكلمة الأخيرة فضلت ترن في ودني.
عقبالك!
هي بتباركلي على جوازي من ليلى، وكأنها فعلًا قفلت الصفحة القديمة ومابقتش شايلة مني حاجة.
وقتها بس حسيت إن فاطمة ماخسرتنيش زي ما كنت متخيل، يمكن أنا اللي خسرت إنسانة عمرها ما هتتعوض.
لكن اللي حصل بعد الفرح بأسبوع كان بداية مشكلة كبيرة بيني وبين شريف، بسبب قرار اتخذه يخص المشروع، وخلاني أكتشف إن حياتي كلها ممكن تتقلب في لحظة.
بعد جواز شريف من فاطمة، العلاقة بيني وبينه اتغيرت شوية، وبقيت بحس إنه بيتعامل معايا بحذر، خصوصًا لما الموضوع يخص المشروع.
وفي يوم طلب يقابلني في مكتبه.
روحت وأنا فاكر إن فيه مشكلة في الشغل، لكنه فاجأني وقال يا محمود، أنا قررت أخرج من المشروع.
اتصدمت وقلتله إيه الكلام ده؟ إحنا لسه في بداية أكبر مشروع لينا!.
قال أنا مش مرتاح لطريقة إدارة بعض الأمور، ومش عايز أكمل وأنا مش مطمن.
حاولت أقنعه، لكنه كان واخد قراره، واتفقنا إننا ننهي الشراكة بشكل قانوني ومن غير ما حد يظلم التاني.
خرجت من عنده وأنا حاسس إن الأرض بتتهز من تحتي، لأن المشروع كان معتمد بشكل كبير على اسمه وعلاقاته.
وبعد فترة، بدأت المشاكل تظهر في شغلي، وخسرت جزء من العقود اللي كنت معتمد عليها، واضطريت أبيع عربية وأقلل مصاريفي.
أما حياتي مع زوجاتي الأربعة، فكانت بقت مليانة خلافات، وكل واحدة فيهم كانت عايزة تحافظ على مستواها ومكتسباتها.
وفي وسط كل ده، كنت بشوف فاطمة من بعيد، عايشة حياتها مع شريف في هدوء، وبتتابع أملاك أولادها وبتطمن عليهم.
وفي يوم قابلتها بالصدفة في أحد المولات، وكانت مع شريف.
سلمت عليها وقلت إزيك يا فاطمة؟
قالت الحمد لله، إزيك يا محمود؟
قلت الحمد لله بصراحة كنت عايز أتكلم معاكي.
شريف استأذن وسبنا نتكلم شوية.
قلت لها أنا عارف إني غلطت في حقك، ويمكن ماقدرتش قيمتك غير بعد ما خرجتي من حياتي.
بصتلي بهدوء وقالت يا محمود، أنا مش بكرهك، وإنت أبو ولادي، والعشرة اللي بينا مش هقدر أنكرها، بس أنا كمان مش هنسى إنك في يوم اخترت تخرجني من حياتك عشان تدخل واحدة تانية.
قلت أنا ندمان يا فاطمة.
قالت الندم مش بيرجع السنين يا محمود، وأنا مش زعلانة إنك اتجوزت، ولا إنك اخترت تعيش حياتك، أنا زعلانة إنك لما ربنا كرمك نسيت مين كانت معاك وإنت محتاج.
سكت، وهي كملت
أنا مشيت من حياتك من غير ما أخد منك غير حقي وحق ولادي، وبدأت من جديد. وعايزة أقولك حاجة، أنا عمري ما كنت ضعيفة، أنا بس كنت بحبك وبستحمل عشان البيت يفضل واقف.
في اللحظة دي شريف رجع، وفاطمة استأذنت ومشيت معاه.
فضلت واقف مكاني، وبصيت وراها لحد ما اختفت وسط الناس.
رجعت البيت، وقعدت لوحدي أفتكر أيام زمان، لما كانت فاطمة بتيجي لي في موقع البناء بالأكل، ولما كانت بتناولني الطوب، ولما كنا بنحلم بعمارة واحدة نملكها.
دلوقتي بقيت عندي عمارات، وعربيات، وفلوس، وأربع زوجات، لكن فقدت الإنسانة الوحيدة اللي كانت بتحبني قبل ما أملك أي حاجة.
وفهمت متأخر إن مش كل اللي حواليك بيحبوك عشان إنت غني، وإن الست اللي شالت معاك في الشدة مش المفروض تكون أول واحدة تستغنى عنها وقت الرخاء.
أما فاطمة، فكملت حياتها مع شريف، وفضلت محافظة على علاقتها بولادها، وعلى حقوقهم اللي تعبت عشان تأمنها.
وفي النهاية، محمود كسب الفلوس وخسر العِشرة، وفاطمة خسرت زوجها، لكنها كسبت نفسها وكرامتها ومستقبل ولادها.
تمت.




