لو بأيدي أختار أدي جايزة نوبل للكفاح لشخص .. هديها للراجل ده كل مرة!
ممكن بعد إذن السوشيال ميديا .. زي ما أي حاجة، سواء تافهة أو غير تافهة، بتطلع تريند، الراجل الجميل وابنه الراجل الصغير ده يطلعوا ولو ليوم واحد تريند ، يوم واحد بس..
طيب مش أعرفكم عليه الأول؟
ده عم مصطفى، راجل مصري بسيط ، متزوج ومخلف ياسين اللي معاه ده، ومحمد
عم مصطفى، برغم إنه كفيف ، لكن ربنا عوضه بأبنه الي بقا عينه الي بيشوف بيها ، عم مصطفي مقعدش في البيت وبقي يشكي حاله ولا مد إيده لحد ، ولا عاش على المعونات برغم أنه حقه تمامآ!
لكنه سلك طريق مختلف شوية ونزل يشتغل بنفسه في المعمار بعرقه وجهده ، وكان بياخد معاه عكازة الحقيقي في الحياة .. أبنه ياسين سنده وضهره ، اللي كان بيروح معاه وياخد بإيده علشان ميخبطش في حاجة ولا يتعور ، ويطلعوا سوا لحد الدور الرابع والخامس ، أكتر من مرة ، وكل يوم على نفس الحال، علشان يلاقي ٢٠٠ ولا ٣٠٠ جنيه بالحلال يستروهم
أبو ياسين، قال إنه كان بيطلب من ياسين ميروحش معاه علشان تعب، وكان بيصحى من وراه بدري علشان يسبقه وينزل من غيره… لكن ياسين كان بيحس بيه ، ويقوم يجري يقوله “مش هسيبك يا بابا.” ❤️
أبو ياسين ، برغم إنه راجل مكافح وكادح ، قال إنه تعب ،لأنه بيمشي بطئ بالشيله التقيلة لحد ماضهره وفقراته اتأثروا ، ومبقاش قادر يشتغل في المعمار، خاصة لما بقى يشوف ابنه بيتعب بالشكل ده عشانه ل، وكل أمنيته إنه يرتاح هو وعياله ويعيشوا حياة كريمة
أبو ياسين ظهر في فيديو مدته ٢٠ ثانية فقط… لكنه حرك قلوب ملايين المصريين، لأن الناس شافت فيه حاجة بقت نادرة جدًا… شافت أب شريف بيجري على لقمة عيشه بالحلال رغم إعاقته، وشافت ابن صغير شايل أبوه بقلبه قبل ما يكون بإيده
من فترة كدا ، بعد رجوع المنتخب ، شفنا رجال أعمال ومستثمرين بيقدموا هدايا وملايين وعربيات وشقق للاعبين… بغض النظر أن الموضوع كان فيه مبالغة شوية بس ده حقهم يكرموا اللي يحبوا يكرموه فلوسهم وهما أحرار فيها
لكن… فيها إيه لو حد فيكم تواصل مع عم مصطفى؟ الراجل اللي بيشقى بجد ، وبيتعب بجد ، وبيحارب كل يوم علشان يجيب لقمة عيشه بالحلال ، فيها ايه لما نريح الطفل الجميل ده ونخليه يروح المدرسة ويتعلم ويعيش طفولتة؟ لو نوفرله فرصة أو شغل يناسب ظروفه ، أو حتى يعيش هو وأولاده بكرامة بعيدًا عن المرمطة والشقا ده
قال الله تعالى:
﴿وَقُلِ اعْمَلُوا فَسَيَرَى اللَّهُ عَمَلَكُمْ وَرَسُولُهُ وَالْمُؤْمِنُونَ﴾
[سورة التوبة: 105]
وربنا سبحانه وتعالى لا يضيع أجر من أحسن عملًا
عم مصطفي وياسين.. التريند الحقيقي ❤️
