اسلام مطلعش ابنهم

خلاص لمينا الأسود .. و الورود .. و خلصنا live علي tiktok و منصات .. و هزرنا و ضحكنا .. نقول لهم الحقيقه بقي عشان ميصحش يا 71461 .. بعتلك علي واتساب مش بترد، اتكلمت مع المعمل اللي عملت معاه التحليل و قالولي انك مش ابنهم و انهم بلغوك بأن التحاليل نتيجتها سلبيه .. و انهم حاولوا يتواصلوا معاك بعد ما شافوا الفيديوهات و الكلام الغريب اللي بتقوله برضو مش بترد عليهم …هنعمل ايه دلوقت بقي ؟

التحليل بيقول انهم من سلاله من قبائل عربيه، و انك من سلاله مستحيل تكون قريبهم بأي شكل من الأشكال … ايه بقي !

اللي فاهمين انهم اهلك انا مش عارف انت كذبت عليهم هما كمان بخصوص نتيجة التحليل او لا … لو كذبت عليهم مش هقولك غير الله يسامحك علي اللعب بمشاعر أسرة ضايع منها ابنهم … و لو عارفين و موافقين علي اللي بتعمله فأنا بقولك ده تزوير و إختلاط أنساب و المتضرر الأكبر هيكون انت و اولادك في المستقبل لما فجأه السر ينكشف و اولادك تلاقي نفسها بدون أوراق ثبوتيه و حضرتك تترمي في السجن (لا قدر الله)

إحنا بقالنا سنين بنحاول نفرح الأهالي برجوع أولادها بعد سنين، و لم و لن نشارك ولو بالصمت علي الفيلم اللي بيحصل ده … لان ده هيشكك الناس في كل قصة نجاح عملناها أو بنعملها و المجتمع هيشوف ان كل دي مجرد أكاذيب لما تنكشف كذبتك دي … و ان فرحتهم و زعلهم كان استغلال لمشاعرهم و خلاص.

انا فعلا مش عارف بتخطط لإيه .. و مصدوم بصراحه !

ده إنذار أخير … و بتحداك تحط نتيجة تحاليل معمل Ysec اللي عملتها في ألمانيا مع اخوك و والدتك (اللي كنت فاكرهم اهلك) و نتيجتها خرجت من كان يوم سلبيه … و من بعدها خرجت تحتفل مش عارف ازاي و علي ايه … و اللي اتكلفت بالمناسبة ١٨ الف جنيه فقط مش ٤٥ الف جنيه زي ما بتقول في كل مكان.

ملحوظه :
والله هفرح لو طلع عنده تحاليل عملها بتقول عكس كلامي … انا عاوزه كويس و عاوز حياته تستقر و يفرح و نفرح معاه