اللص التائب
اللي في الصورة دا.. الحاج محمد راشد.. اللي مشهور بلقب اللص التائب.. واللي فرحان بالاسم دا.. وان ربنا من عليه يكون تائب.. فيا ترى ايه قصته..
الحاج محمد بيحكي انه اتعلم السرقة وهو عنده 14 سنة.. من مشهد في التلفزيون.. لما شاف مسلسل فيه ممثل بيضرب الباب بالكتف ويكسره.. فعجبه المشهد قوي لان الممثل بقى غني بعدها.. وقرر انه يقلده ويبقى حرامي.. وقال علشان ميبقاش حرام انا هسرق الاغنيا بس.. لان عندهم فلوس كتير فسرقتي ليهم مش هتضرهم… اللي هو نظرية عم ضبش وطبق الكشري.
بيقول كان عندي نظرية اني بسرق ما قل وزنه وثقل ثمنه، فلوس الماظ دهب، وكنت بسرق من الاغنياء، وفي الأعياد بفرق على الغلابة، لاني حاسس بيهم..
عم محمد، مخدش السلم من اوله، لا اول ما سرق، سرق شقة سعيد الفطاطري سفير مصر في بلجيكا، كانت الشقة في العجوزة، وهو مالوش في سرقة الخزن، اخره بس يقلب الدواليب وخلاص، بيقول لقيت الدهب والالماظ برا الخزنة فخدتهم، ولقيت خزنة كبيرة قوي، اه لو ليا في الخزن كنت سددت ديون مصر.. طيب ما بسيطة سعيد الفطاطري يسدد ديون مصر يا عم محمد..
بيقول انا اول واحد ابقى حرامي دولي، يعني احترف السرقة، لانه سافر الاردن يسرق، بيقول قعدت اسرق في عمان يومين، اني اعرف بتوع الأردن بيخبوا الفلوس فين معرفتش.. فرجعت مصر.. يعني فشلت في الاحتراف يا عم محمد..
بيقول ان اكبر مبلغ مسكه في السرقة كان من شقة احمد عبد الحكيم عامر، بتاع 3 مليون جنيه في الرخص، ومش عارف احمد عبد الحكيم عامر دا ابن المشير ولا تشابه اسماء، المهم، الراجل اتنغنغ فعمل عيد ميلاد، جاب فيه حسن الأسمر ومطربين وراقصات، فيه رقاصة عجبته، فاداها ساعة الماظ ماركة رادو كان سارقها.. فبتقوله جبتها منين دي.. قالها جوز اختي راجل اعمال.. وهو جوز اخته فاتح محل فول وطعمية في بولاق الدكرور.
اما اغرب مكان راح يسرقه، قال روحت لقيت واحد تاني سارقه، ونازل بالحاجة، معاه جهاز فيديو وفلوس مصري ودولارات، فروحت مثبته، قلتله اثبت محلك… فالحرامي التاني قاله بالله عليك يا باشا انا غلبان ومعايا عيال، وعايز اروح لعيالي (فكره صاحب الشقة).. فقاله طيب هات اللي معاك.. راح مديله كل حاجة.. فعم محمد أدى للراجل الف جنيه و200 دولار.. قاله يلا مش هحبسك علشان عيالك.. وخد الحاجة وروح..
بيقول كمان ان كان عنده عادة، انه طالما نوي ينزل يسرق لازم يسرق، مينفعش يروح بايده فاضية، ومرة سرق بيت صوفي ابو طالب، رئيس مجلس الشعب، بالمناسبة الراجل دا حكم مصر 9 أيام.. بعد وفاة الرئيس السادات بصفته رئيس مجلس الشعب، لحد ما تم الاستفتاء على مبارك..
من طرائفه في السرقة انه بيراقب الشقة، ويوم السرقة بياخد بوكية ورد، ويلبس بدلة شيك، ويطلع يرن الجرس، فتح حد الباب بيقول أي حاجة وسوري غلطت في العنوان ومحدش بيشك فيه لانه كان بيبقى شيك وماسك ودر مش مظهر حرامي، طيب لو محدش رد، بيكسر الباب ويخش يقلب الشقة، في مرة قعد يرن محدش رد… فكسر الباب ودخل لقى اللي جوا اخرس..
ومرة تانية دخل شقة، يا دوب فتح الدولاب، فجرس الباب رن، راح بص من العين السحرية، لقاه محصل النور، راح عامل نفسه بيتكلم في التليفون، وفتح للمحصل، وحاسبه على وصل الكهربا بـ 168 جنيه ومشى المحصل، قعد يقلب بعد كدا في الشقة ملقاش ولا مليم.. فالسرقة دي جات عليه بخسارة..
بيقول بنيت عمارة، وسوبر ماركت كبير، وكنت عامل نفسي رجل اعمال، وعملت شقة مخصوص احط فيها المسروقات لحد ما اصرفها.. بيقول ان من عادته انه كان بيقرا الجرايد علشان يشوف اخبار السرقات اللي بيعملها.. وفي مرة لقى خبر عن شقة سرقها.. انه سرق شنطة وساب شنطة، الشنطة اللي سرقها فيها مستندات بس.. والتانية فيها 6 كيلو دهب و200 الف دولار.. بيقول دي اكتر مرة اتحسرت يها وزعلت زعل.. وكان نفسي ارجع تاني اسرق الشقة.. لان صاحب الشقة الله يخرب بيته.. كان حاطط الفلوس في شنطة وحشة.. والمستندات في شنطة حلوة..
اتقبض عليه واتحكم عليه بالسجن 3 سنين.. لما مسكته ست كبيرة.. بيقول في السجن.. قلت يا رب.. ولما شفت البشر اللي في السجن، قلت يا رب توب عليا.. يا رب انا مصلتش ركعة في حياتي.. اوعى تقبض روحي وانا كدا.. يا رب أعيش لحد ما اخرج علشان اتوب.. انت عارف كل دا.. هو اتسجن وهو 24 سنة بس.. وطلع من السجن 26 سنة..
بيقول خدت كل اللي اتبقى من اللي سرقته.. وروحت لنجوى إبراهيم.. المذيعة.. وهي ودته لمساعد وزير الداخلية عبد الحليم موسى.. ردله كل الأموال والدهب.. فمساعد الوزير طلعه الحج.. ومن ساعتها رجع من الحج تائب وبيحب يحكي حكايته علشان تكون عبرة لاي حد عايز يسرق… وعمل كتاب العودة الى الله.. مذكرات لص تائب.. بيقول حطيت في الكتاب خلاصة خبرتي كلص.. وكنت عايز اسميه “كيف تحمي نفسك من السرقة”.
بيقول امنية حياتي، اني اموت النهاردة قبل بكرا، انا دلوقتي نضيف، بس مش عارف بكرا هيحصل ايه.. والمجتمع مبيرحمش، والحياة صعبة، وانا عندي 10 عيال.. وعايز ربنا يحميهملي..
#بهاء_حجازي
